सारांश
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले निजी क्षेत्रलाई डर र त्रासमा राखेर देशमा व्यापार–व्यवसायको वातावरण बन्न नसक्ने बताएका छन् ।
शनिबार काठमाडौंमा आयोजित कार्यक्रममा बोल्दै लामिछानेले व्यवसाय गर्ने क्रममा कानुन उल्लंघन भए त्यसलाई अन्य अपराधभन्दा फरक ढंगले आर्थिक अपराधका रूपमा हेर्नुपर्ने धारणा राखे । निजी क्षेत्रका व्यवसायीहरू तर्सिएको र आत्तिएको आफूले महसुस गरेको भन्दै उनले सरकारको ध्यानाकर्षणसमेत गराए ।
उनले आफ्नो पार्टीको स्पष्ट धारणा निजी क्षेत्रलाई सुरक्षित वातावरण उपलब्ध गराउने रहेको बताए । विगतका नेतृत्वलाई दोष दिएर उम्किने पक्षमा आफू नरहेको भन्दै अब सरकारको जिम्मेवारी आफ्नो काँधमा आएको उनको भनाइ थियो ।
लामिछानेले सरकारलाई काम गर्न पर्याप्त समय दिनुपर्ने उल्लेख गर्दै पछिल्ला राजनीतिक गतिविधिबारे आएका हल्लालाई गम्भीर रूपमा नलिन आग्रह गरे । सरकार आफ्नो लक्ष्यबाट विचलित भए पार्टीले आवश्यक हस्तक्षेप गरेर सही बाटोमा ल्याउने उनको दाबी थियो ।
उनले प्रतिकूल परिस्थिति आउँदैमा यात्रा रोकिने नभई चुनौती सामना गर्दै सरकारलाई लक्ष्यसम्म पुर्याउने प्रतिबद्धता समेत व्यक्त गरे ।
