सारांश
काठमाडौं । नेपाली कांग्रेसका सभापति गगन थापाले पार्टीको १५औँ महाधिवेशनको उद्घाटन समारोहमा पूर्वसभापति शेरबहादुर देउवाका लागि कुर्सी खाली राखिएको बताएका छन्।
महाधिवेशनलाई सम्बोधन गर्दै थापाले देउवा उद्घाटन समारोहमा सहभागी हुने अपेक्षासहित उनको सम्मानमा कुर्सी खाली राखिएको बताए।
थापाले केही नेता तथा कार्यकर्ता असन्तुष्ट भएर कार्यक्रममा सहभागी नभएको उल्लेख गर्दै देउवाको अनुपस्थितिप्रति आफूहरूको कुनै गुनासो नरहेको बताए।
उनले देउवाको सम्मान केवल उनको निवासमा पुगेर अभिवादन गर्ने विषय नभएको स्पष्ट पारे। देउवाले नेतृत्व गरेको कांग्रेसलाई अझ बलियो, ठूलो र फराकिलो बनाउनु नै उनको वास्तविक सम्मान हुने थापाको भनाइ थियो।
‘शेरबहादुर दाइको मान राख्ने कुरा दिनमा कति पटक उहाँको ढोकामा पुगेर सलामी दियो भन्ने होइन,’ थापाले भने, ‘उहाँले काम गर्नुभएको पार्टीलाई अग्लो र फराकिलो बनाउन सक्यौँ कि सकेनौँ, मान त्यहाँबाट रहने हो।’
