काठमाडौं । नेपाली कांग्रेसको पुनर्गठनका लागि विशेष महाधिवेशनमा जानुपर्ने विषय पार्टी बैठकमा औपचारिक रूपमा प्रवेश गरेको छ।

सानेपास्थित क्षतिग्रस्त पार्टी कार्यालयमा बसेको कार्यसम्पादन समितिको बैठकमा महामन्त्री गगन थापाले नियमित वा विशेष महाधिवेशनमार्फत नयाँ नेतृत्व चयन गरेर निर्वाचनमा जानुपर्ने प्रस्ताव प्रस्तुत गरेका हुन्। उनको प्रस्तावलाई अर्का महामन्त्री विश्वप्रकाश शर्माले समर्थन गरेका छन्।

बैठकमा केही नेताहरूले संसद विघटन असंवैधानिक भएकाले पुनर्स्थापनाको पक्षलाई मुख्य एजेन्डा बनाउनुपर्ने धारणा राखेका थिए भने, थापा–शर्मा पक्षले अब निर्वाचनतर्फै ध्यान केन्द्रित गर्नुपर्ने तर्क अघि सारेका छन्।

१४ औं महाधिवेशनबाट निर्वाचित सभापति शेरबहादुर देउवाको चारवर्षे कार्यकाल मंसिरमा सकिँदैछ। विधान अनुसार अवधि एक वर्ष थप्न सकिने भए पनि थापाले त्यो विकल्प नलिनुपर्ने स्पष्ट पारेका छन्।

दशैंअघि केन्द्रीय समिति बैठक बोलाएर नियमित वा विशेष महाधिवेशन गर्नेबारे निर्णय गर्ने तयारी भएको नेताहरूले बताएका छन्।