सारांश
काठमाडौं । राष्ट्रपति रामचन्द्र पौडेलले प्रतिनिधिसभाबाट सरकार गठन नभएपछि संसद् विघटन गरिएको बताएका छन्। संविधान दिवसको अवसरमा शितलनिवासमा आयोजित समारोहमा उनले मुलुक नयाँ सपनासहित परिवर्तनको मार्गमा प्रवेश गरेको उल्लेख गरे।
राष्ट्रपति पौडेलले अन्तरिम सरकारले राष्ट्रिय क्षतिको पुनर्निर्माण गर्दै ६ महिनाभित्र निर्वाचन सम्पन्न गरी जनप्रतिनिधिमूलक संस्थालाई सत्ता हस्तान्तरण गर्नुपर्ने बताए।
उनी जेनजी आन्दोलनले ल्याएको क्षतिको पुनर्निर्माण मुख्य कार्यभार भएको पनि बताए। राजनीतिक दल, प्रशासनिक निकाय र बौद्धिक समुदायलाई असहमति र द्वन्द्व नभई समन्वय र सहकार्यका साथ निर्वाचन सफल बनाउन आह्वान गरेका छन्।
पौडेलले भने, “हरेक पुस्ताको सहभागिताले लोकतन्त्र बलियो हुन्छ। म पनि १७ वर्षको उमेरमा प्रजातन्त्रको लागि राजनीतिमा होमिएको थिएँ। सबैको सुझबुझ र सहयोगले हामीले असहज परिस्थितिलाई सम्हालेका छौँ।”
