कार्यक्रममा पौडेलले नेताहरूको सुझाव तथा समीक्षा प्रतिवेदन सुनिरहेका बेला प्रहरी टोली पुगेको थियो। उक्त कार्यक्रममा एमालेका महासचिव शंकर पोखरेल, उपाध्यक्ष पृथ्वीसुब्बा गुरुङ, नेता छविलाल विश्वकर्मा तथा रामबहादुर थापा लगायत शीर्ष नेताहरूको उपस्थिति थियो।

प्रहरी स्रोतका अनुसार पौडेललाई सम्पत्ति शुद्धीकरणसम्बन्धी अनुसन्धानका लागि नियन्त्रणमा लिइएको हो। जिल्ला प्रहरी कार्यालय सुर्खेतका प्रमुख प्रहरी उपरीक्षक ठाकुरप्रसाद पोखरेल नेतृत्वको टोलीले उनलाई नियन्त्रणमा लिएपछि केही समय जिल्ला प्रहरी कार्यालयमा राखिएको थियो। त्यसपछि उनलाई नेपालगञ्ज हुँदै काठमाडौं पठाइएको बताइएको छ।

एक प्रहरी अधिकृतका अनुसार पक्राउअघि नै पौडेललाई अनुसन्धानबारे जानकारी भइसकेको थियो। प्रहरी टोली पुगेपछि उनले महासचिव शंकर पोखरेलसँग संक्षिप्त छलफल गर्दै आफू काठमाडौं जानुपर्ने भएकाले कार्यक्रमलाई निरन्तरता दिन आग्रह गरेका थिए।

उता, एमाले नेताहरूले कार्यक्रमकै बीचमा पार्टीका उपाध्यक्षलाई पक्राउ गरिएको घटनाप्रति असन्तुष्टि जनाएका छन्। कार्यक्रममा सहभागी एमाले केन्द्रीय सदस्य दल रावलले यसलाई राजनीतिक प्रतिशोधको संकेत भएको दाबी गरेका छन्। उनका अनुसार कार्यक्रम चलिरहेका बेला पक्राउबारे जानकारी पाएपछि सहभागीहरू आश्चर्यचकित बनेका थिए।