सारांश
काठमाडौं । गायक दुर्गेश थापा र अभिनेत्री प्रियंका कार्कीको सहकार्यमा सार्वजनिक भएको विवादित गीत ‘मास्टर्नी’ युट्युब तथा अन्य सामाजिक सञ्जालबाट हटाइएको छ।
शुक्रबार साँझ गायक दुर्गेश थापा र आयंका फिल्म्स प्रालिले छुट्टाछुट्टै विज्ञप्ति जारी गर्दै गीत हटाइएको जानकारी दिएका हुन्। साथै, गीतका केही शब्द र प्रस्तुतीकरणले शिक्षक–शिक्षिका तथा दर्शकहरूको भावनामा ठेस पुगेको स्वीकार गर्दै दुवैले सार्वजनिक रूपमा क्षमायाचना गरेका छन्।
दुर्गेशले गीतको प्रस्तुतीकरणबाट कसैको भावना आहत भएकोमा दुःख व्यक्त गरेका छन्। यस्तै, फिल्मकी निर्माता तथा अभिनेत्री प्रियंका कार्कीले उक्त गीत फिल्मको आधिकारिक गीत नभई प्रचार–प्रसारका लागि मात्र तयार गरिएको स्पष्ट पारेकी छन्। सम्मानित शिक्षक पेसाको गरिमामा आँच पुर्याउने कुनै उद्देश्य नरहेको उल्लेख गर्दै उनले पनि गल्ती महसुस गरेको बताएकी छन्।
गत मंगलबार सार्वजनिक भएको ‘मास्टर्नी’ गीतका शब्द र भिडियोलाई लिएर सामाजिक सञ्जालमा व्यापक आलोचना भएको थियो। नेपाल शिक्षक महासंघले पनि गीतको प्रचारप्रसार तत्काल रोक्न माग गर्दै आपत्ति जनाएको थियो। विवाद चुलिएपछि अन्ततः गीत सबै डिजिटल प्लेटफर्मबाट हटाइएको हो।
