उनका अनुसार अहिले कुनै एक दल वा एक नेताको नेतृत्वमा मात्रै कम्युनिस्ट आन्दोलन अघि बढ्ने अवस्था नरहेको भन्दै सबै कम्युनिस्ट शक्तिलाई समेट्ने ‘नयाँ कम्युनिस्ट केन्द्र’ निर्माणको बहस आवश्यक छ।

विप्लवले पछिल्ला दुई दशकमा कम्युनिस्ट नेतृत्व र दलहरूले गरेका कमजोरीका कारण एक समय करिब ७० प्रतिशत रहेको जनसमर्थन अहिले २२–२५ प्रतिशतमा सीमित भएको दाबी गरे। उनले नयाँ सोच, नीति र नेतृत्वसहित आन्दोलनलाई रूपान्तरण गर्न सके मात्रै युवापुस्तामाझ कम्युनिस्ट आन्दोलन पुनः स्थापित हुन सक्ने धारणा राखे।

सरकारबारे टिप्पणी गर्दै उनले प्रधानमन्त्री बालेन शाह नेतृत्वको सरकारको भविष्यबारे विभिन्न राजनीतिक र बौद्धिक वृत्तमा प्रश्न उठ्न थालेको बताए। विभिन्न बुद्धिजीवी, विज्ञ, कूटनीतिज्ञ र राजनीतिज्ञबीच सरकारको ‘दिनगन्ती सुरु भएको’ भन्ने चर्चा चलिरहेको आफूले सुनेको उल्लेख गर्दै त्यसमा कति सत्यता छ भन्ने समयले पुष्टि गर्ने बताए।

विप्लवले सरकारले जनअपेक्षाअनुसार काम गर्न नसकेको आरोप लगाउँदै यही कारण सरकारप्रति असन्तुष्टि बढ्दै गएको टिप्पणी गरे।