काठमाडौं । ११ वैशाख, २०७८ मा तत्कालीन प्रधानमन्त्री केपी शर्मा ओलीले पुनर्निर्मित धरहराको उद्घाटन गरेको २ वर्ष पुरा भएको छ । तर, धरहरा टावर निर्माणकै काम सकिएको छैन ।
रमण कन्स्ट्रक्सनका परियोजना व्यवस्थापक रमेश पौडेल टावरतर्फको ९८ प्रतिशत काम सकिएको बताउँछन् । गत पुसमा नै यो परियोजनाको निर्माणको थपिएको म्याद सकिएको थियो । ठेकदार कम्पनी रमण कन्स्ट्रक्सनले एक वर्ष म्याद थपको प्रस्ताव गरेको छ ।
काम नसकिंदै हतार–हतार लिफ्ट जोडेर उद्घाटन गर्दा धरहराको भर्याङ नै बनिसकेको थिएन । अहिले पनि प्रविधि जडानसम्बन्धी काम चलिरहेको छ । संग्रहालय निर्माणको काम अझै बाँकी छ । धरहरा सर्वसाधारणलाई चढ्नका लागि कहिले खुला गर्ने भन्ने तय भएको छैन । कहिलेसम्म धरहरा निर्माणको सबै काम सकिन्छ भन्ने पनि यकिन छैन ।
