काठमाडौं । सम्पत्ति शुद्धीकरण अनुसन्धान विभागले रिडी पावर कम्पनी लिमिटेडका तत्कालीन अध्यक्ष गुरूप्रसाद न्यौपाने र कम्पनीका कार्यकारी निर्देशक कुवेरमणि नेपालविरूद्ध मुद्दा दायर गरेको छ । 

न्यौपानेले आफू अध्यक्ष हुँदा कार्यकारी निर्देशक नेपालसँग मिलेर कम्पनीको सेयरको भित्री कारोबार (इन्साइडर ट्रेडिङ) गरेर एक करोड ९९ लाख १० हजार २५२ रुपैयाँ आर्जन गरेका थिए ।

कम्पनीका कार्यकारी निर्देशक नेपालले न्यौपानेलाई सहजीकरण गरिदिएका हुन् । उनीहरू दुईजनाको मिलेमतोमा एक करोड ९९ लाख १० हजार २५२ रुपैयाँ सम्पत्ति शुद्धीकरण (मनी लाउण्डरिङ) निवारण ऐन, २०६४ को दफा ३ को उपदफा (१) को कसुर गरेको पनि विभागले जनाएको छ ।

न्यौपानेलाई एक करोड ९९ लाख १० हजार २५२ रुपैयाँ बिगो कायम गरी यो बिगोको दोब्बर जरिबाना, कसुरको मात्राअनुसार कैद सजाय गर्न माग गरिएको छ ।  त्यस्तै, ऐन विपरीतका काम गर्न सहयोग गर्ने कार्यकारी निर्देशक नेपाललाई पनि न्यौपानेले पाउने सजायको आधा सजाय माग गरिएको छ ।