सारांश
काठमाडौं । राष्ट्रिय वाणिज्य बैंकको नयाँ बानेश्वर शाखाबाट जेनजी आन्दोलनका क्रममा ठूलो मात्रामा नगद र सुन लुटपाट भएको खुलासा भएको छ ।
नेपाल राष्ट्र बैंकका गभर्नर विश्व पौडेलले एक पडकास्टमार्फत संसद् भवनभित्र रहेको उक्त शाखाबाट करिब ५ करोड रुपैयाँ नगद र १८ किलो सुन लुटिएको जानकारी दिएका छन् ।
उनले भने, “एक ठाउँमा गम्भीर लुटपाट भएको छ । संसद् भवनमा रहेको राष्ट्रिय वाणिज्य बैंकबाट नगद र सुन चोरी भएको हो ।”
गभर्नर पौडेलका अनुसार सो लुटपाटको मूल्य करिब ३८ करोड रुपैयाँ बराबर पर्छ । यसबारेमा सिसिटिभी फुटेज हेरेर अनुसन्धान भइरहेको उनले बताए ।
आन्दोलनका क्रममा पेमेन्ट सिस्टम निरन्तर सञ्चालनमा रहोस् भन्ने राष्ट्र बैंकको विशेष ध्यान थियो । त्यस बेला प्रणाली जोगाउनका लागि सम्पूर्ण बैंकिङ क्षेत्र सक्रिय रहेको गभर्नर पौडेलले बताए ।
उनका अनुसार आन्दोलनका क्रममा ६८ वटा बैंक शाखामा आक्रमण भएको र ६९ वटा एटिएममा असर पुगेको भए पनि समग्र बैंकिङ प्रणाली भने सामान्य अवस्थामा छ ।
