काठमाडौं । नेपाल प्रिमियर लिग (एनपिएल) को तेस्रो संस्करणअघि कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानको स्तरोन्नति तथा व्यवस्थापनको काम अन्तिम चरणमा पुगेको छ।

नेपाल क्रिकेट संघ (क्यान) का सचिव पारस खड्काका अनुसार दर्शक क्षमता बढाउने, प्रवेशद्वार सुधार गर्ने तथा शौचालय र आवतजावतमा देखिएका समस्या समाधान गर्ने काम भइरहेको छ।

गत संस्करणका कमजोरी सुधार गर्दै दर्शक, खेलाडी र सञ्चारकर्मीलाई सहज हुने गरी मैदान व्यवस्थापन गरिँदैछ। दसैँसम्म सबै तयारी पूरा गर्ने क्यानको योजना छ।

दसैँ–तिहारको बीचमा प्रतियोगिता भए पनि नेपाली क्रिकेटको बलियो समर्थक आधारका कारण दर्शक उत्साहमा कमी नआउने क्यानको विश्वास छ। यसपटक विभिन्न टोलीले चर्चित विदेशी खेलाडीसमेत अनुबन्ध गरेकाले एनपिएलको आकर्षण थप बढ्ने अपेक्षा गरिएको छ।

एनपिएलको तेस्रो संस्करण कात्तिक ९ देखि मंसिर ५ गतेसम्म काठमाडौंमा सञ्चालन हुनेछ।