सारांश
काठमाडौं । चलचित्र ‘एक्टर : टेक वान’ तत्काल हलमा प्रदर्शन नगर्न काठमाडौं जिल्ला अदालतले अल्पकालीन अन्तरिम आदेश जारी गरेको छ ।
मंगलबार काठमाडौं अदालतका न्यायाधीश ढाकाराम पौडेलको इजलासले यही माघ २२ गतेसम्म उक्त चलचित्रको प्रदर्शन स्थगन गर्न आदेश जारी गरेको हो ।
माघ २२ गते दुवै पक्षलाई अदालतमा बोलाइएको अदालतका सूचना अधिकारी दीपककुमार श्रेष्ठले जानकारी दिए ।
गएको शुक्रबार चलचित्र ‘एक्टर’ निर्माणपक्षले प्रतिलिपि अधिकार ऐनअन्तर्गत चलचित्रको नाम र कथावस्तु दुवै मिलेको भन्दै ‘एक्टर : टेक वान’विरुद्ध मुद्दा दर्ता गरिएको थियो ।
‘एक्टर : टेक वान’ बुधबार (माघ १६) रिलिज हुने तय थियो ।
‘एक्टर’मा प्रिन्स थापा, कशिस दाहाल, सरोज खनाल, शिवु शाह, मनीषा पाण्डे, निशा केसी भण्डारी, महेन्द्र मैनालीलगायत कलाकारको अभिनय थियो । ‘एक्टर : टेक वान’मा प्रदीप खड्का, आना शर्मा, दिव्या रायमाझी, राजबल्लभ कोइरालालगायत कलाकारको अभिनय छ ।
