सारांश
काठमाडौं । फ्राइडे रिलिजअन्तर्गत आजबाट तीन नेपाली चलचित्र एकसाथ प्रदर्शनमा आएका छन् । ‘लालीबजार’, ‘मालतीको मंगले’ र ‘गुरुआमा’ आजदेखि देशभर प्रदर्शनमा आएका हुन् ।
स्वस्तिमा खड्का अभिनित ‘लालीबजार’ अदालतमा परेको रिटका कारण वैशाखमै रिलिज हुन नसकेपछि ढिलो गरी प्रदर्शनमा आएको हो । यम थापाले निर्देशन गरेको यो चलचित्र बादी समुदायको कथामा आधारित छ ।
त्यस्तै विजय बराल र वर्षा राउत मुख्य भूमिकामा रहेको ‘मालतीको मंगले’लाई प्रकु पाण्डेयले निर्देशन गरेका छन् । चलचित्रमा रामकृष्ण ढकाल निर्माता रहेका छन् ।
मिथिला शर्मा र बुद्धि तामाङ अभिनित ‘गुरुआमा’ पनि आजैबाट प्रदर्शनमा आएको छ । यसलाई प्रेम सोनी सुनारले निर्देशन गरेका हुन् ।
देशकै ठूलो मल्टिप्लेक्स चेन क्यूएफएक्समा भने सबैभन्दा धेरै शो ‘लालीबजार’ले पाएको छ । त्यसपछि ‘मालतीको मंगले’ र ‘गुरुआमा’ रहेका छन् ।
