काठमाडौं। काठमाडौं उपत्यकाका नदी तथा खोलाको किनारामा निर्माण अनुमति सम्बन्धी मापदण्डबारे सर्वोच्च अदालत ले पुरानै व्यवस्था कायम गरेको छ ।

न्यायाधीशहरू सुनिल कुमार पोखरेल, बालकृष्ण ढकाल र नृपध्वज निरौला को पूर्ण इजलासले २०६५ मंसिर १ गते तय गरिएको मापदण्डअनुसार नै निर्माण गर्न पाउने आदेश दिएको हो ।

आदेशअनुसार अब बागमती नदी, विष्णुमती नदी र मनोहरा नदी किनारामा २० मिटर खाली छाडेर निर्माण गर्न पाइनेछ ।

त्यस्तै, धोबीखोला मा आयोजना लागू भएको क्षेत्रमा परियोजनाको प्लानिङअनुसार निर्माण गर्न सकिनेछ भने प्लानिङ नभएको क्षेत्रमा ९ मिटर खाली राख्नुपर्नेछ ।

नख्खु खोला मा १२ मिटर, बल्खु खोला, कर्मनासा खोला, कोइके खोला, साले खोला र महादेव खोला मा १० मिटर, करखुसी खोला मा ६ मिटर तथा टुकुचा खोला, सामाखुसी खोला लगायत अन्य खोलामा ४ मिटर छाड्नुपर्ने व्यवस्था कायम गरिएको छ ।

साथै अदालतले कुनै पनि खोला, खोल्सी र राजकुलो छोप्न नपाइने स्पष्ट आदेशसमेत दिएको छ ।