काठमाडौं । इन्जुरी समयको अन्तिम क्षणमा गोन्सालो रामोसले गरेको निर्णायक गोलसँगै पोर्चुगलले क्रोएसियामाथि २–१ को रोमाञ्चक जित निकाल्दै फिफा विश्वकपको अन्तिम १६ मा स्थान सुरक्षित गरेको छ।

टोरन्टोमा सम्पन्न प्रतिस्पर्धात्मक खेलमा इन्जुरी समयमा क्रोएसियाले बराबरी गोल गरे पनि भिडियो समीक्षापछि अफसाइड ठहर भएपछि उक्त गोल रद्द भयो। निर्णयलाई लिएर खेलाडी र अफिसियलबीच केहीबेर तनावपूर्ण अवस्था समेत सिर्जना भएको थियो।

पहिलो हाफ गोलरहित बराबरीमा सकिएको खेल दोस्रो हाफमा खुल्यो। ५३औँ मिनेटमा इभान पेरिसिचले गोल गर्दै क्रोएसियालाई अग्रता दिलाए। त्यसको १५ मिनेटपछि कप्तान क्रिस्टियानो रोनाल्डोले पेनाल्टीमार्फत गोल गर्दै पोर्चुगललाई १–१ को बराबरीमा फर्काए।

खेल अतिरिक्त समयमा धकेलिने संकेत देखिँदै गर्दा प्रशिक्षकले ८१औँ मिनेटमा रोनाल्डोलाई विश्राम दिँदै युवा खेलाडीलाई मैदानमा उतारे। उक्त निर्णयले निकै चर्चा बटुलेको छ। पूर्व डिफेन्डर स्टीफन वार्नकका अनुसार, “खेलको लय र रणनीतिलाई हेर्दा त्यो परिवर्तन बिल्कुल उचित थियो।”

प्रशिक्षकको योजना अन्ततः सफल साबित भयो। इन्जुरी समयको चौथो मिनेटमा राफायल लियाओले दिएको सटिक क्रसमा गोन्सालो रामोसले शक्तिशाली हेडमार्फत गोल गर्दै पोर्चुगललाई अविस्मरणीय जित दिलाए।

यो जितसँगै पोर्चुगलले अन्तिम १६ मा स्थान बनाएको छ। अब क्वाटरफाइनल प्रवेशका लागि उसले अस्ट्रियालाई पराजित गर्दै आत्मविश्वासका साथ अघि बढेको स्पेनसँग प्रतिस्पर्धा गर्नेछ।