सारांश
काठमाडौँ । नेपाली कांग्रेसले सञ्चारगृहमा प्रहरी प्रवेश गरी पत्रकारमाथि भएको धरपकडको छानबिन गर्न संसदीय विशेष समिति गठनको माग गरेको छ ।
सोमबार सिंहदरबारमा बसेको कांग्रेस संसदीय दलको बैठकले घटनाको स्वतन्त्र, निष्पक्ष र पारदर्शी छानबिन गरी दोषीलाई कारबाही गर्न माग गरेको हो ।
कांग्रेसले पत्रकारमाथि धरपकड गर्ने र त्यसका लागि आदेश दिनेहरूलाई समेत कानुनी दायरामा ल्याउनुपर्ने जनाएको छ । प्रमुख सचेतक बासना थापाले निर्वाचनबाट प्राप्त जनादेश संविधान र कानुनभन्दा माथि हुने अधिकार नभएको बताइन् ।
स्पष्ट कानुनी आधार र अदालतको अनुमति सार्वजनिक नगरी समाचार कक्षमा प्रहरी परिचालन गर्नु प्रेस स्वतन्त्रतामाथिको अनुचित दबाब भएको कांग्रेसको ठहर छ । यसबारे सरकारले जवाफ दिनुपर्ने उसको माग छ ।
कांग्रेसले सरकारमाथि संवैधानिक संरचना कमजोर बनाउँदै आफूअनुकूल शासन व्यवस्था स्थापना गर्न खोजेको आरोपसमेत लगाएको छ । न्यायपालिकाको स्वतन्त्रता र प्रेस स्वतन्त्रतामाथि हस्तक्षेप अस्वीकार्य हुने कांग्रेसको भनाइ छ ।
पत्रकारमाथिको धरपकडलगायत विवादित सरकारी गतिविधिको छानबिन, दोषीमाथि कारबाही र संसदीय विशेष समिति गठनसँगै कांग्रेसले प्रतिनिधिसभा बैठक सञ्चालन गर्न पनि माग गरेको छ ।
