सारांश
काठमाडौं । फाइनलमा पाकिस्तानमाथि ३–० को जित निकाल्दै साविक विजेता भारतले साफ यू–१९ च्याम्पियनसिपको उपाधिमा ह्याट्रिक गरेको छ ।
शनिबार त्रिपुरेश्वरस्थित दशरथ रंगशालामा भएको खेलमा भारतलाई जित दिलाउन मङ्लेथाङ केप्गेनले दुई र ग्वग्वम्सार गोयरीले एक गोल गरे । खेलको ६४औँ मिनेटमा मङ्लेथाङ केप्गेनले भारतलाई अग्रता दिलाएका थिए ।
केप्गेनले नै ८५औँ मिनेटमा गोल गर्दै भारतको अग्रता दोब्बर पारे । इन्ज्युरी समयमा गोयरीले गोल गरेपछि भारतले ३–० को सहज जित पक्का गरेको हो ।
यसअघि, भारतले सन् २०१९ र २०२१ गरी लगातार दुई संस्करणको उपाधि जितेको थियो । त्यसअघि, २०१५ मा भएको पहिलो र २०१७ को दोस्रो संस्करणको उपाधि नेपालले जितेको थियो ।
पाकिस्तानले भुटानलाई र भारतले नेपाललाई पेनाल्टी सुटआटमा हराउँदै फाइनलमा स्थान बनाएका थिए ।
