सारांश
काठमाडौं । ओपनर आसिफ शेख र अनिल साहको अर्धशतकप्रेरित नेपालले ट्वान्टी–२० शृंखलाको अन्तिम खेलमा वेस्ट इन्डिज ‘ए’विरुद्ध ६ विकेटको सहज जित निकालेको छ ।
शनिबार कीर्तिपुरस्थित त्रिवि क्रिकेट मैदानमा वेस्ट इन्डिज ‘ए’ले प्रस्तुत गरेको १७३ रनको लक्ष्य नेपालले १८.५ ओभरमा चार विकेट गुमाएर भेट्टायो ।
जितका बाबजुद नेपालले शृंखला गुमाएको छ । पाँच खेलको शृंखलामा वेस्ट इन्डिज ३–२ ले च्याम्पियन बनेको हो ।
आसिफले ३५ बलमा दुई चौका र पाँच छक्कासहित ५१ रन जोडे । कुशल मल्लले १८ बलमा तीन चौका र तीन छक्कासहित ३७ रन बनाए । कुशल भुर्तेलल १३ र दीपेन्द्रसिंह ऐरी पाँच रन बनाएर आउट भए ।
त्यसअघि, टस जितेर ब्याटिङमा उत्रिएको वेस्ट इन्डिजले निर्धारित २० ओभरमा सात विकेट गुमाएर १७२ रन बनाएको थियो ।
शृंखलाका यसअघि चारमध्ये तीन खेलमा जित निकाल्दै वेस्ट इन्डिज प्रतियोगिताको च्याम्पियन बनेको हो। पहिलो खेलमा नेपाल चार विकेटले विजयी भएको थियो । त्यसपछि वेस्ट इन्डिजले १०, ७६ र २८ रनको जित निकालेको थियो ।
