सारांश
काठमाडौं । अन्तर्राष्ट्रिय नेपाली कलाकार समाज इनास यूएईको आयोजनामा म्यूजिक भिडियो कलाकार संघ नेपालको प्रस्तुति स्वरुप "बृहत् सांगीतिक साँझ तथा सम्मान कार्यक्रम" हुने भएको छ।
नेपाली ख्यातिप्राप्त करीब २ दर्जन कलाकारको सहभागिता रहने सो कार्यक्रम यही जुन ९ तारिख अर्थात् जेष्ठ २७ गते आइतबार हुँदैछ।
यस कार्यक्रममा वरिष्ठ गायक आनन्द कार्की देखि अहिलेका चर्चित गायक टंक बुढाथोकी सम्मको प्रस्तुति रहने कार्यक्रम संयोजक शिवन पोखरेलले जानकारी दिएका छन् ।
कार्यक्रमलाई भव्य र सभ्य बनाउनको लागी इनास युएईका अध्यक्ष एम. डि. बोहोराले आव्हान गरेका छन् ।
अध्यक्ष बोहोराले युएईवासीलाई उपस्थितिको लागि आग्रह गरेका छन् । उनले समाजिक संजालमा लेखेका छन् ," कार्यक्रम भव्य अनि सभ्य रूपमा सफल बनाउनको निमित्त नेपालबाट आमन्त्रित ख्याति प्राप्त कलाकारहरू आउदै हनुहुन्छ | तसर्थ तमाम यूएईबासी सम्पुर्ण नेपाली दाजुभाईहरू दिदीबहिनीहरू सहभागी भई कार्यक्रमलाई भब्य रूपमा सफल पार्नको लागि हार्दिक अनुरोध तथा हार्दिक निमन्त्रण गर्दछौ॥"
अध्यक्ष बोहोराले कार्यक्रमको तयारी अन्तिम चरणमा पुगिसकेको पनि जानकारी गराएका छन् ।
स्मरणीय कुरा के छ भने इनास विश्वका करीब ७५ वटा देशमा बिस्तारित छ । त्यसमध्ये इनास युएई निकै कृयाशील छ। बेला-बेलामा यस किसिमका कार्यक्रम आयोजना गर्दै आएको इनास युएई एम. डी. बोहोरा अध्यक्ष भएपछि अझ धेरै गतिशील र चलायमान भएको इनास ग्लोबल बताउँछ ।
"बृहत् सांगीतिक साँझ तथा सम्मान कार्यक्रम" कार्यक्रम जुन ९ क्लब एस के सेभेन बरदुबईमा १ बजे देखि शुरु हुने बताईएको छ।
