सारांश
काठमाडौं । नेपालमा संघ, प्रदेश, स्थानीय तह र खेल संघको सहकार्यमा स्पोर्ट्स स्कुल स्थापना हुने भएको छ ।
शुक्रबार संघीय संसद्को संयुक्त बैठकमा आगामी आर्थिक वर्ष ०८२/८३ को नीति तथा कार्यक्रम प्रस्तुत गर्दै राष्ट्रपति रामचन्द्र पौडेलले यस्तो बताएका हुन् ।
उनले युवालाई आर्थिक र सामाजिक रूपान्तरणका प्रमुख वाहकका रूपमा परिचालन गरिने बताए । युवामा स्वयंसेवी र सदाचारी भावना विकास गरिने उनको भनाइ छ ।
उनले विद्यालय तहदेखि खेलकुद तालिम, प्रशिक्षक र खेलाडी प्रोत्साहनका कार्यक्रम सञ्चालन हुने बताए ।
यी हुन् नीति तथा कार्यक्रममा समावेश भएका युवा र खेलकुदको विषय
७४. युवालाई आर्थिक र सामाजिक रुपान्तरणका प्रमुख बाहकको रुपमा परिचालन गरिनेछ । युवामा स्वयंसेवी र सदाचारी भावना विकास गरिनेछ ।
७५. युवाहरुको शारीरिक र मानसिक विकासको लागि नियमित खेलकुद सञ्चालन र राष्ट्रिय तथा अन्तर्राष्ट्रिय खेलकुद प्रतियोगिताहरु आयोजना गरिनेछ । संघ प्रदेश स्थानिय तह र खेलसंघको सहकार्यमा स्पोर्ट्स स्कुल कार्यक्रम सुरु गरिनेछ । विद्यालय देखि खेलकुद तालिम, प्रशिक्षक र खेलाडी प्रोत्साहनका कार्यक्रमहरु सञ्चालन गरिनेछ ।
७६. रंगशाला लगायतका खेलकुद पूर्वाधार निर्माणमा तीन तहका सरकार र निजी क्षेत्रको पनि सहभागिता सुनिश्चित गर्न कानुनी व्यवस्था मिलाइनेछ । खेलकुदलाई निजी क्षेत्रका संस्थागत सामाजिक उत्तरदायित्व कार्यक्रमसँग जोडिने छ । त्रिभ्वन विश्वविद्यालय क्रिकेट मैदानलाई आधुनिक स्तरको क्रिकेट मैदानमा रुपान्तरण गरिनेछ ।
७७.अन्तर्राष्ट्रिय पदक प्राप्त खेलाडी र उनीहरूका सन्ततिलाई अध्ययनका लागि छात्रवृत्तिको व्यवस्था मिलाइने छ ।
